Nauðungarhjónaband

Ef þú neyðist til að ganga í hjónaband gegn vilja þínum kallast það nauðungahjónaband og er mansal.

Hvað er nauðungarhjónaband?

Nauðungarhjónaband er þegar manneskja er neydd í hjónaband sem hún vill ekki ganga í. Það gæti verið til að fá réttindi eða til að hinn aðilinn hagnist á því, til dæmis til að fá dvalarleyfi eða ríkisborgararétt.

Þú gætir verið í nauðgunarhjónabandi ef:

• Þér er hótað, eða þrýst á þig með ofbeldi eða annars konar þvingunum til að giftast einhverjum sem þú vilt ekki giftast.
• Þú neyðist til að giftast einhverjum sem hagnast á því með því að fá dvalarleyfi eða ríkisborgararétt.
• Þú vissir ekki að þú værir að fara að gifta þig.
• Þú mátt ekki tala um hjónabandið þitt við aðra.
• Þér er lofað dvalarleyfi, ríkisborgararéttur eða peningar í staðinn fyrir að ganga í hjónaband.
• Einhver annar hagnast á því að þú gangir í hjónaband gegn vilja þínum.

 Ert þú í nauðungarhjónabandi? Hafðu samband við 112 og fáðu hjálp.

 

Heimild: Neyðarlínan – Nauðungarhjónaband

UN WOMAN segir

23 barnungar stúlkur eru þvingaðar í hjónaband á hverri mínútu.

Ofbeldi gegn konum, mansal, mæðradauði, þvinguð barnahjónabönd, sultur og vannæring eru allt vandamál sem færast í aukana samhliða langvarandi þurrkum eða flóðum sem rekja má til loftslagsbreytinga. Þá eru stúlkur gjarnan teknar úr skóla svo þær geti aðstoðað við fæðuöflun.

Á tímum neyðar í kjölfar hamfara og átaka fjölgar tilfellum þvingaðara barnahjónabanda umtalsvert.

Staðreyndin er því miður sú að um 12 milljónir stúlkna eru þvingaðar í hjónaband á ári hverju. Þessi skaðlegi siður hefur víðtæk áhrif á líf stúlkna, sem neyðast til að hætta í skóla og eru því líklegri til að festast í viðjum fátæktar.

Barnungar stúlkur eru talsvert líklegri til að deyja af barnsförum þar sem óþroskaðir líkamar þeirra eru ekki búnir undir meðgöngu og fæðingu.

Mæðradauði er ein helsta dánarorsök stúlkna á aldrinum 15-19 ára. Það þýðir að stúlkur á grunn- og menntaskólaaldri eru líklegri til að látast af barnsförum en vegna sjúkdóma eða slysa.

Það hefur sýnt sig að þvinguðum barnahjónaböndum fjölgar í kjölfar náttúruhamfara, á tímum átaka og þegar viðvarandi fæðuskortur ríkir. Fjölskyldur sem búa við sárafátækt, eða hafa misst heimili sín og fyrirvinnur vegna hamfara, eru líklegri til að gifta burt barnungar dætur sínar til að létta á útgjöldum fjölskyldunnar. Í sumum tilfellum eru stúlkurnar einfaldlega seldar í hjónaband svo hægt sé að kaupa mat.

Hvernig vinnur UN Women að afnámi þvingaðra barnahjónabanda?

UN Women vinnur að upprætingu þvingaðra barnahjónabanda með því að þrýsta á stjórnvöld að festa í lög hærri giftingaraldur, þjálfa þorpshöfðingja og mæðrahópa í að veita fræðslu um skaðlegar afleiðingar siðarins og styðja stúlkur sem leystar hafa verið úr slíku hjónabandi aftur til náms.

Heimild: UN Woman